සහෘදයානන්ගේ කූජිත සමරුපොතයි මමයි පිනයි

හා හා පුරා කියලා අයනු ආයනු කියන්න පොත් මල්ලත් උස්සන් ස්කෝලේ ගියේ මගේ ලොකු අයියත් එක්කලා.. රෝද දෙකේ බයිසිකලේ තමයි ඉතින් ඒ කාලේ අපේ ප්‍රාඩෝ එක..
හැමදාම උදේට මාව ස්කෝලේ එක්කන් යන්න අපේ අයියා මාරම උනන්දුයි!
හේතුව එදා නොතේරුනාට දැන් දැන් නේ සීන් එක තේරෙන්නේ මට! අනේ අම්මපා මෙහෙමත් අයියලා!?

ගේට්ටුව ළඟටම ගිහින් ඇරලා මාව නොපෙනී යනකල් අයියා ගේට් එක ළඟට වෙලා බලා හිටියා මං හිතුවේ මම එක වසරේ චුට්ටන් බට්ටිච්චියක් නිසා මට ආදරේට කියලා.. හනේ හපොයි නෑ, මට පස්සේ කාලේ යමක් කමක් තේරෙන කොටයි සීන් එක තේරුනේ ඒ මට ආදරේට නෙමෙයි දහය වසරේ ශිෂ්‍යා නායිකා අක්කියෙක් ට ආදරේ හිතිලා කියලා. ඉතින් මං හිනා වෙන්න ද? 😂😂 අඬන්න ද? 😭😭
😜😜😜

ඔන්න ඉතින් අපේ අයියගේ වන් සයිඩ් ලව් එකට ක්ලයිමෑක්ස් එකට දවස උදා වුණා.. ගේට් එක ළඟදි අර අක්කියට පේන්න අපේ අයියා දුන්නා ඒ කාලේ ආදරේ අත් පොත 'සමරු පොත' අර අක්කිට දෙන්න කියලා. 'අයියා දුන්නා' කියලා කියලම දෙන්න කිව්වා. ඔන්න මං මේක දික් කරගෙන යද්දි ඒ අක්කි පත්තියටම ගියා.. මං අතාරිද?? නෑනේ නෑනේ.. පස්සෙන්ම ගියා 😂😂 'අක්කි මේක අපේ අයියා ඔයාට දෙන්න කිව්වා' කියලා දිලා මං ගියා පන්තියට!

වැඩේ ගොඩ එක වසරේ දි ඔන්න බ්‍රෝකර් වැඩ 😉!!
ඔන්න ඒ පාර දැන් ඔයාලා කල්පනා කරනවා අයියා ලව් කොරන්න තරම් ලොකු වයසක් ද කියලා නේ? ඔව් ඔව්.. අපේ වයස් පරතරේ අවුරුදු බර ගාණක්.. ඒත් කරන්න ඕනන් කුප්පැහි වැඩ ඔක්කොම මං අයියත් එක්ක කූට ව්‍යාපරයක් විදියටක කරගෙන ගියා.. ඒක වෙනම කතාවක් 😂

ඔන්න දැන් එකේ සෙට් එක පන්තියෙන් එලියට එක්කන් ගිහින් ටීච කිව්වා ඇස් වහන් පරිසරයෙන් ඇහෙන සද්ද වලට සවන් දෙන්න කියලා.. මාත් ඇස් වැහුවා.. ඔන්න වාහන යනවා ඇහෙනවා, කපුටෙක් කෑගහනවා තව පන්තියක ටීච කෙනෙකුත් කෑ ගහනවා තව මට ඇහුනා සුමිහිරි ඉකිබිඳුම් හඬක්.. 'මිස්, අර නංගිට ඉහි ඉහි.. ලොකු සර්.. එ..එන්න කි..කිව්වා'

අනේ අහිංසක මං මොනා දන්නවාට ද?
ලොකු සර් මාව පිළිගත්තේ ලොකූ.... වේවැලකුත් අතේ තියාන.. අම්මේ මතක් වෙනකොට මේ දැන් ඇස් වලට කදුළු උනනවා.. අපේ අයියට හාල් ගරන්න හිතෙන්නේ එතෝටනේ.. 😭
'සමරු පොත කාගෙද?'
'අපේ අයියගේ'
'අයියා කෝ?'
'ගෙදර'
'පොත ඕනි ද?'
'ඔව්'
'එහෙනම් අයියාට ඇවිත් ඉල්ලන් යන්න කියන්න'
😭😭😭😭

අපේ අයියා එයිද පෙන්ස් ඕක ගෙනියන්න.. තාම ගියේ නෑ ඉතින්!!!

මේකේ හයිලයිට් සීන් එක මං දැන ගත්තෙත් පස්සේ.. මම අර සමරු පොත ගිහින් දීලා තියෙන්නේ අර අක්කිගේ පන්ති භාර මිස් පන්තියේ ඉන්නැද්දිමලු 😂😂
'අපේ අයියා මේක ඔයාට දෙන්න කිව්වා' කියලා උජාරුවට පන්තියේ මිස් ඉස්සරහා දීලා ඇවිත්!
මිස් ඒ අක්කිව දක්කලා ලොකු සර් ලඟට.. ඒ අක්කි මාව දැක්කුවා.. ඒත් අද වෙනකල් මට බැරි වුණා අපේ අයියාව දක්ක ගන්න.

ඉතින් ඔන්න ඔහොමයි අපේ අයියා නඟෝ නාඩගම් පටන් ගත්තේ